საქართველოდან მიგრაცია საკმაოდ გავრცელებულ მოვლენად შეიძლება ჩაითვალოს. 2002-2017 წლებში საქართველოდან ემიგრაციაში 1.4 მილიონი ადამიანი წავიდა არასამთავრობო ორგანიზაცია „საზოგადოება და ბანკების“ და ილიაუნის „ფინანსური განათლების ცენტრის“ ერთობლივი კვლევის მიხედვით. ევროკავშირის თავშესაფრის სააგენტოს (EUAA) მონაცემებით, საქართველო შედის ქვეყნების ათეულში (სირია, ავღანეთი, თურქეთი, ვენესუელა, კოლუმბია, პაკისტანი, ბანგლადეში, საქართველო, უკრაინა, ერაყი), საიდანაც ევროკავშირს ყველაზე ხშირად მიმართავენ თავშესაფრის თხოვნით. ევროკავშირსა და შენგენის ზონის ქვეყნებში თავშესაფრის მაძიებელი საქართველოს მოქალაქეების რაოდენობა წლების მიხედვით შემდეგნაირად გამოიყურება:
- 2019 — 22 765
- 2020 — 8 905
- 2021 — 14 970
- 2022 — 28 797
- 2023 — 25,209
ამის მთავარი მიზეზი უმუშევრობაა, ასევე ქვეყნის სოციალურ-ეკონომიკური და მძიმე ცხოვრების პირობები. ზოგ შემთხვევაში პოლიტიკური მიზეზების გამოც ტოვებენ ქვეყანას. ევროკავშირის ქვეყნებში და განსაკუთრებით კი ბელგიაში, უფრო და უფრო მეტი ყურადღება ეთმობა ნებაყოფლობითი დაბრუნების კონცეფციას.
მიგრაციის სფეროში თანამშრომლობა ბელგიის კარიტასსა და საქართველოს კარიტასს შორის 2006 წლის მარტიდან დაიწყო. პროექტით გათვალისწინებული დახმარება არ არის შეზღუდული და დამოკიდებულია თითოეული დაბრუნებული ადამიანის ინდივიდუალურ მოთხოვნებზე. ამ დახმარების აუცილებლობა და პრიორიტეტი, ყოველ კონკრეტულ შემთხვევაში განისაზღვრება სპეციალური კონსულტაციებისა და ურთიერთშეთანხმების შემდეგ.
აქედან მოყოლებული, შემდეგ წლებში თანამშრომლობის ხელშეკრულება დაიდო ევროპის სხვადასხვა ორგანიზაციებთან, როგორიცაა Caritas Austria, “Micado”- Migration Germany, Solwodi-solidarity with Women in Distress, OFII-French Office for Immigration and Integration, DRC -danish refugee council, FRONTEX- European Border and Coast Guard Agency
2022 წლიდან მიგრაციის განყოფილებამ ხელშეკრულება გააფორმა FRONTEX-თან, ევროპის საზღვრების და სანაპიროს დაცვის სააგენტო, რომელიც არის მსოფლიოში უმსხვილესი ორგანიზაცია და უზრუნველყოფს ევროპის ყველა ქვეყნიდან მიგრანტების დაბრუნებას.
